શુક્રવાર, 17 મે, 2013

વિચારોના વૃંદાવનમાં એક રાધા છો તમે

વિચારોના વૃંદાવનમાં એક રાધા છો તમે,
અમારા હૃદયમાં જ રહીને કેટલા આઘા છો તમે ?

વહેલી સવારની પહેલી કિરણ છો તમે,
ઉપવનમાં સતત રેલાતી સુવાસ છો તમે.

જાણીને બધું જ કેટલા અજાણ છો તમે ?
લાગે છે વરસો જુની કોઈ ઓળખાણ છો તમે.

મંદિરમાં થાતી આરતીનો રણકાર છો તમે,
ઈશ્વરની કોઈ છબીને અણસાર છો તમે.

દુનિયામાં સંબંધોનાં કોઈ ને કોઈ નામ હોય જ છે,
'આનંદ' નામ વિનાનો મીઠો સંબંધ છો તમે.